1. grein

Félagið heitir Félag íslenskra bókaútgefenda og var stofnað árið 1889. Lögheimili þess er í Reykjavík.

2. grein
Félagið skal í hvívetna gæta sameiginlegra hagsmuna íslenskra bókaútgefenda. Það skal efla almenna bókmenningu, bókakaup og bóklestur á Íslandi árið um kring og skal lögð sérstök áhersla á að auka áhuga barna og unglinga á bókum. Þá skal félagið afla sem gleggstra upplýsinga um ástand og horfur á íslenskum bókamarkaði á hverjum tíma svo og þróun útgáfumála og höfundarréttar erlendis.

3. grein
Félagar geta orðið allir sjálfstæðir lögaðilar, einstaklingar eða fyrirtæki, sem gefið hafa út að minnsta kosti fjóra bókatitla á undangengnu útgáfuári.
Beiðni um inngöngu í félagið skal vera skrifleg og sendast formanni sem leggur hana fyrir næsta stjórnarfund. Ef stjórnin synjar umsækjanda um aðild að félaginu getur hann skotið málinu til félagsfundar.
Nýr félagi öðlast almenn félagsréttindi, nýtur sérkjara sem félögum bjóðast og gengst undir skyldur sem lög félagsins kveða á um þegar umsókn hans hefur hlotið samþykki og inntöku- og árgjald hefur verið greitt. Um atkvæðisrétt á aðalfundi vísast til 5.greinar.

4. grein
Árgjald til félagsins og inntökugjald skal ákvarðað á aðalfundi ár hvert.

5. grein
Atkvæðisrétt á fundum hafa þeir sem greitt hafa árgjald til félagsins en nýir félagar þó ekki fyrr en á aðalfundi árið eftir að þeir hafa gengið í félagið.
Greiðsla árgjalds veitir fullgildum félögum rétt til eins atkvæðis á félagsfundum og aðalfundi.

6. grein
Stjórn félagsins fer með málefni þess milli funda, annast fjárreiður, ræður starfsmenn og framkvæmir samþykktir, sem gerðar eru á aðalfundi eða félagsfundum, auk þeirra verkefna sem lög ákveða beint.
Í stjórn félagsins sitja níu menn að formanni meðtöldum og tveir til vara. Formann skal kjósa sérstaklega til eins árs í senn. Árlega skulu að auki kjörnir í stjórn fjórir aðalmenn til tveggja ára og tveir varamenn til eins árs í stað þeirra sem ganga eiga úr stjórn. Endurkjör er heimilt. Kjör til stjórnar skal vera skriflegt sé þess óskað.
Stjórnin skiptir með sér verkum sem hér segir: Formaður kemur fram fyrir hönd félagsins, kveður til funda og stýrir þeim. Varaformaður gegnir störfum formanns í forföllum hans. Ritari færir fundargerðabók félagsins og félagsstjórnarinnar og annast bréfaskriftir séu þau verkefni ekki falin starfsmanni félagsins. Gjaldkeri annast fjárreiður félagsins og ávaxtar sjóði þess. Hann ber ábyrgð á gerð ársreiknings félagsins í lok hvers reikningsárs sem er frá 1. janúar til 31. desember og leggur reikninginn endurskoðaðan fyrir aðalfund til samþykktar.

7. grein
Aðalfundur fer með æðstu völd varðandi málefni félagsins. Hann setur félaginu lög samanber 9.grein og kýs stjórn þess. Aðalfund skal halda fyrir miðjan maí mánuð ár hvert og skulu þar tekin fyrir eftirfarandi dagskrárefni í þessari röð:
1. Formaður skýrir frá gjörðum félagsins á liðnu starfsári.
2. Gjaldkeri leggur fram reikning félagsins fyrir liðið starfsár til samþykktar.
3. Teknar eru til afgreiðslu tillögur um lagabreytingar ef einhverjar eru.
4. Fram fer kosning formanns til eins árs.
5. Fram fer kosning annarra stjórnarmanna samkvæmt 6.grein laga.
6. Fram fer kosning löggilts endurskoðanda félagsins.
7. Stjórn leggur fram tillögu að árgjaldi og inntökugjaldi félagsmanna til samþykktar.
8. Tekin eru fyrir önnur mál er upp kunna að verða borin.

Aðalfund og félagsfundi skal boða í bréfi með minnst viku fyrirvara. Þessir fundir eru lögmætir séu þeir löglega boðaðir.

Á fundunum ræður einfaldur meirihluti atkvæða, nema í undantekningartilvikum sbr. 8., 9. og 10.grein. Félagi getur falið starfsmanni sínum eða öðrum aðila að fara með atkvæði sitt á fundum, enda sé það gert skriflega, umboð lagt fram á fundi og þess getið í fundargerð.
Félagsfundi skal halda þegar stjórn félagsins ákveður eða þegar þrír félagar krefjast þess skriflega og tilgreina fundarefni. Þá skal stjórn boða til fundar innan 14 daga frá því að henni barst krafa um fund. Í fundarboði skal geta helstu mála. Félagsfundir ráða málefnum félagsins næst á eftir aðalfundi.

8. grein
Úrsögn úr félaginu skal miðast við áramót.
Hafi félagi ekki greitt árgjald sitt og/eða inntökugjald síðastliðin tvö ár fyrir aðalfund missir hann tímabundið félagsréttindi sín og atkvæðisrétt á fundum þar til uppgjör hefur farið fram. Félagsmaður sem ekki hefur gefið út bók sl. fjögur ár fellur sjálfkrafa af félagsskrá. Skal félaga tilkynnt um að hann falli af félagsskrá með mánaðar fyrirvara. Félagi getur sótt um undanþágu frá því að hann falli af félagsskrá til stjórnar félagsins sem er heimilt að verða við ósk liggi fyrir að um tímabundna stöðvun sé að ræða.
Til þess að víkja skráðum félaga úr félaginu þarf 4/5 atkvæða allra viðstaddra félaga á lögmætum fundi enda hafi fyrirhugaður brottrekstur verið kynntur í fundarboði.

9. grein
Lögum þessum verður ekki breytt né við þau aukið nema á aðalfundi og skulu tillögur um breytingar á þeim boðaðar félögum viku fyrir fund. Til þess að lagabreytingar séu lögmætar þarf að samþykkja þær með 2/3 hlutum greiddra atkvæða.

10. grein
Nú þykir ráðlegt að slíta félaginu og skal tillaga um það send öllum félögum mánuði áður en hún kemur fyrir félagsfund. Til þess að hún öðlist samþykki þarf hún að hljóta 4/5 atkvæða og ákveður þá fundurinn hvernig eignum og skuldum félagsins skuli ráðstafað.

(Lög endurskoðuð og samþykkt á aðalfundi félagsins 29. apríl 2010)